يستر على عرضك زحّط..
طوني حداد
هلق شيلونا من الخطبة “العصماء” يللي “قرطنا” ياها “ابن الضريح” وكل الوقت
يتشّ بدني من التأثر البالغ السن القانوني ورح تفرّ الدمعة من عيني..
شيلونا من مضمون خطاب “محسوبكن” اللي واضح أنّه مكتوب بعناية متوخيّاً الرقص على الحبال ومراعاة توازنات جديدة على مستوى الاقليم وعلى المستوى الدولي..
وكما لايخفى على نباهتكم ياقوم فمعتلي المنبر اليوم سعد السعود ماهو سوى ببغاء ناقل رسائل ماخلف الحدود ومش ضروري يكون “محسوبكن” فهمان شو عم يحكي..وعالأرجح مش فهمان..بس ماشي الحال عم يتدرّب الصبي وعم يتحسّن..وبركي بعد شي اربعين سنة مش أكتر بيخفّف سآلة وقلّة طعمة وبيصير يعرف يلقي خطاب متل الخلق والعالم..
خليني احكي عن تفصيل بشوفو مهم من بعد اذنكم وهو عبارة عن سؤال:
فخامة ناطور بعبدا السابق والرئيس الفخري لنادي “عمشيت” الرياضي ووالد زوجة أخو رئيس بلدية جبيل الحالي..يافخامة “ميشال سليمان” :
شو عم تعمل هون بمهرجان ال”بييل” يابو شربل؟
طبعاً ماكنّا ناطرين حضور فخامتك اليوم حتى نعرف اصطفافك, فورقة التوت سقطت عن عورتك منذ أتحفتنا بخطاب “الخشب” ومنذ صار لسان حالك يقول:
عشتم وعاشت السعوديّة..!
أسألك سؤال العارف لأقول:
ماغلطنا فيك ياريّس المذلّة لمّا عبّر عن موقفنا تجاهك صحافي ذكي من بلدي اسمه: “ابراهيم الأمين” ..
صحافي من جماعتنا..جماعة “الخطاب الخشبي”حيث قال لك:
“يستر على عرضك فلّ”..
و بعدا فلّيت من بعبدا..وكانت ساعة خير..
لكن ياريت فليت من المشهد السياسي كله وعلى طول..
ياريت فليت وبقيت بمشهدك الاجتماعي فقط ..
بزيادة عليك..وعندك فلوس كفاية جنيتها من بحّة حنجرتك وانت تهتف بحياة “الشقيقة” السعوديّة..يعني وضعك مرتاح..
عيش حياتك الله يطول بعمرك..
كنت عيش “الفالانتان” ياباشا وبلاما كنت تتحفنا بطلتك السخيفة اليوم, والمصيبة ماحدا عبّرك ولا حتى ابن الضريح كلّف خاطرو يجاملك بكلمة واحدة ولو عن كذب ..ماكان شايفك أصلاً..
معتبر وجودك تحصيل حاصل وواجباتك تجي تقدّم فروض الطاعة والولاء..!
هالقد شايفك صبي السعودية يافخامة ميشال سليمان..
على شو عم تبهدل حالك هالقد؟ أو هيدي هوايتك؟
ياريّس كنت اعمل شي مسلّي ومفيد الك اكتر من حضورك الباهت اليوم ذكرى الضريح..
كنت تسلّى بنادي عمشيت الرياضي ..
لعاب فوتبول..اركب بسكلات..موتوسيكل ياخيي..اركب شو مابدك بس ماترجع تركب على ضهرنا..
اتمشى بضيعتك الجميلة ..عمشيت بلد ساحرة..خاصة “دغوش الغياب”..
مارس ال”سكي” بفاريّا..تزلّج..
أجل تزلّج مولانا..
يعني بالمشبرح زحّط..
زحّط يستر على عرضك..
لكن قبل ماتعمل كل هالاشيا -نصيحة لوجه الله-لازمك تعمل أهم وأفيد شي لفخامتك:
كلّف خاطرك وارتكب زيارة لفخامة الرئيس المقاوم اميل لحّود..
بتستفيد يابو شربل..
أقلّه بتاخود درس عاجل ومفيد بالكرامة..!
المزيد ..
ليست هناك تعليقات:
إرسال تعليق