زياد الرحباني..فل يارفيق..

Friday , 3 October 2014 ، آخر تحديت 09:29 - بانوراما الشرق الأوسط

طوني حداد

يللي صفّق للشيوعي زياد الرحباني أمس مابيحقلّو يقوّص عليه اليوم.. فقط لأنه مارس شيوعيته..!

زياد “ماتغيّرنا”.. أنتوا اللي “تغيّرنا”..

هالقد القصة..

وكمان أنا متأكّد بأنّو يللي قوّص على زياد بالأمس مش رح يصفقلو اليوم..

لأنو اليوم قال صاحب:” قوم فوت نام وصير حلام أنّو بلدنا صارت بلد”:

” خرى على الجمهورية” وهيدا شي بيبعص جماعة الحرية والاستقلال وثورة الأرنبيط وشلاح الحريري وهزّ ياوز..لأنهم -انتوا أكبر القدر- هم جماعة العبور للجمهورية والدولة والحداثة والحضارة “يحضرلك الخير ياضنايا” ومعتبرين قبائل المقاطعجية الطائفية المذهبية ومجالس المخاتير “ومختار المخاتير يللي حكمه بيمتد من الساحل للجرد” في مايسمى “لبنان الكرامة والشعب العنيد” دولة و جمهورية..

والله هيك بيقولوا..وانا سامعها على “الفيوتشر” وعلى “mtv” تبع المرّ ومرمر زماني..

واالأضرب من هيك أنّو قال أبو الزوز:

سورية بظروفها الحالية سابقتنا مئة سنة وناسها مثقفين وبيسمعوا وبيناقشوا !

العمى على هالكفر ..!

كيف تجرأ على هذا؟ ..تبّاً له..

وكما لايخفى على ذكائكم بأنّ هذه جريمة لاتغتفر عند جماعة “الحئيئة” و”قديس معراب”

كارثة لمّا حدا يقول أنو السوري سابقن..

العمى هيدا “العتّال” سابق “كرافات” ابن الأشرفية؟ قصدي “الاشغفية” عشان ماتزعل الست سولانج الجميّل..

أن يكون السوري مثقف وبني آدم راقي شي بيبعص أي فينيقي “غيّور”..هيدا بالمناسبة غير “مار الياس الغيور” السلام على اسمو ..

شي بيبعص أي فينيقي بيعتبر “بيعطبر حسب معجم أمين الجميل اللغوي” ومقتنع بأنّ السوري بالكتير لايزيد عن كونه عامل شرشوح وضيع أمّي” بدكانة الملك “أحيرام” جدّ الفنيقيين ..!

زياد الرحباني:

لكونك لم ترضِ أحداً أنتَ اليوم حرٌ ..حرٌ وحرُ..

كما قال صاحب:

“بيروت تفاحة والقلب لايضحك..وحصارنا واحة في عالم يهلك”..

ولأن القلب لايضحك :

فلّ رفيقي زياد..فل الله معك..

بس تبقى ميّل تبقى سآل..متل الأول ضل سآل..!

نحن يارفيق جربنا نوقّف الشعور وجربنا نوقّف العواطف حسب نظريتك..

الى حد ما مشي حالنا..

بس ماقدرنا نوقف الحنين..

so

رح نشتقلك..